RSS

హల్లో... ఏమీ తోచడం లేదంటారా....


   మా స్నేహితురాలు ఫోన్ చేసి ఏమీ తోచటం లేదు అంటూ మొదలు పెట్టింది. ఏమీ తోచడం లేదనేసరికి  నేను అందుకున్నాను.  అదేమిటండీ ! ఇదివరకయితే “ తోచక తోటికోడలు పుట్టింటికి వెళ్ళింది “ అనే సామెత వుండేది . ఇప్పడు సమయం సరిపోవడం  లేదనేవారే కాని ,తోచడం లేదంటారేమిటి? అంటూ ఆశ్చర్యంగా “ మీకు Whatsapp, FB,  , లాంటి కల్పతరువుండగా అలా అంటారేమిటి?  మన స్నేహితులతో కబుర్లు చెప్పండి, కంటికి కనిపించినవి , మీకు నచ్చినవి ఫొటో లు తీయండి. అందరితో పంచుకోండి, లేదంటే మీ దగ్గరి చీరలు కట్టుకొని సెల్ఫీ తీసుకొని  ఆచీర ఎప్పుడు కొనుక్కున్నారో, ఎవరు యిచ్చారో, ఆ ముచ్చటలు రాయండి. కాదంటరా, మీరు చేసిన బ్రేక్ ఫాస్టు , వండిన వంట, షేర్ చెయ్యండి. కొత్త డిషెస్ అయితే వాటి విధానం కూడా రాయండి.
  అయ్యొ ! మీరు రచయిత్రి కాదంటారా ?  అబ్బే ! అవి కధలు కాదుకదండీ ! మీఅనుభవాలు, అనుభూతులు అందరితో పంచుకోవడం , దీనితో మీ సోషల్ కమ్యూనికేషన్ పెరుగుతుంది.  ఏమిటీ, అందరికి నచ్చదంటారా? అందరికి నచ్చాలని రూలు ఏమి లేదు కదా? నచ్చితే కొంతమంది లైక్ లు పెడతారు, లేక కామెంట్లు పెడతారు, విమర్శిస్తారు, విమర్శ్లలతో ముందుకి వెళ్ళిపోండి,. ఏడాది తిరిగేసరికి వర్ధమాన రచయిత్రి అయిపోతారు.నిజంగా చెబుతున్నానండి. మీ కబుర్లు తియ్యగా వుంటాయి.వాటికో రూపం యిచ్చి వీటిలొ పెట్టండి. ఎందుకయినా మంచిది మనిద్దరం కలసి తీసుకున్న ఫొటో లు జాగ్రత్త గా పెట్టుకుంటాను.వర్ధమాన రచయిత్రి తో అంటూ నాకు అవకాశాం వస్తుంది, ఏమంటారు? అరే! నన్ను చూడండి, నాకు ఏమి వచ్చునని ? ఏ దో తను రాస్తున్నారని, రాయడం మొదలుపెట్టాను. ఏం రాయాలో తెలీక, మా వారు రాసినదానికి ప్రతిగా రాయడం మొదలుపెట్టాను. చదివిన వారు ప్రొత్సహించారు,కొంతమందికి నచ్చలేదు, కాని నాకు మాత్రం  తృప్తిగా ఉండేది.. పొద్దు, శంకరాభరణం, తురఫ్ ముక్క, మాలిక, కొముది ల్లో గడి నింపి పంపడమంటే ఎంత బావుండేదో చెప్పలేను. వాటి కోసం తొందరగా పని పూర్తి చేసేసుకొని ఎదురుచూసేదాన్ని. ఇప్పుడు అన్ని మూత బడిపోయాయి  నాకు ఇంటరెస్టు తగ్గిపోయింది.  కానీ  వీటితో కొత్త పరిచయాలు, స్నేహాలు, ఏర్పడ్డాయి.చాలా సంతోషమనిపించింది. బ్లాగులతో మా వారు బాబాయిగా మారితే నేను అందరికి పిన్ని గా మారిన నాకు, ఎన్నో కొత్త బంధాలు, వారి ఆప్యాయత,  వెల కట్టలేని అభిమానం  నాస్వంతమయ్యాయి. అయినా అప్పుడప్పుడు కెలుకుతూ వుంటాను. ఎవరినీ నొప్పించకుండా, నిందించకుండా, రాస్తే తప్పులేదు.తెల్లారితే ఎంతోమంది పలకరింపులు, వారి అభిప్రాయాలు, అభిమతాలు, కొత్తవిషయాలు, తెలుసుకోవడం అన్ని చాలా బాగుంటాయి.సీరియస్ గా చెబుతున్నాను. ఇందులో ఒకసారి ప్రవేశించి చూడండి, తోచకపోవడమన్న మాటే వుండదు. కాదంటే ఆరోగ్యవంతంగా వుండేలా చూసుకోండి.  మీ నియంత్రణ లో అవి వుండాలి కాని వాటి కి అలవాటు పడిపోకండి.బానిసలుగా మార్చేస్తుంది. దేనికి అతి పనికిరాదు కదా! పిల్లలతో , స్నేహితులతో అనందంగా చిన్నప్పటి  జ్ఞాపకాలు, ముచ్చట్లు, గుర్తు చేసుకొండి. మీ అనుభవాలు, చిన్న చిట్కాలు అందరితో పంచుకోండి.. ఏమీ తోచడం లేదంటూ మాత్రం ఫోన్ చేయకండి. ఒకే! వుంటాను.

" పొరుగింటి మీనాక్షమ్మను........."


      ' ఇంటి గుట్టు లంకకు చేటు " అని పెద్దలంటే, ఇప్పటివారు, ' ఇంటి ' గుట్టు ఫేస్ బుక్కు లో పెట్టి రట్టు చేయకే ' అంటున్నారు.   ' ఆ ' ఇంటి కాకి ఈ ఇంటి మీద వాలకూడదు' అని ఇదివరకువారంటే, ఇప్పుడు, ' ఆ ఇంటి పావురం ఈ ఇంటిమీద వాల కూడదు ' అంటున్నారు ( కాకులెక్కడున్నాయి, అన్నీ పావురాలె గా)   ' ' పొరుగు ఇంటి మీనాక్షమ్మను చూశారా ' , ' పొరుగు ఇంటి పుల్లకూర రుచి ' కి బదులుగా, ' పొరుగు ఇంటి మీనా ని చూశారా, తను పెట్టిన పోస్టుకి, ఇన్ని లైక్కులూ, ఇన్ని కామెంట్లూ వచ్చాయిట, అంతేకాదు, ఇంతమంది షేర్ చేసుకున్నారట' -- ఇదీ పరిస్థితి. ( భాష మారినా భావం మారిందంటారా?)   ' అందరిమీదా కేకలు వేసే పులిలాటి ఆఫీసరు, ' ఇంటిలో పిల్లి'. మరో ఇంటిలో పెత్తనం అంతా ఆవిడదే. ఆవిడే ఆ 'ఇంటి ' యజమానురాలు. ' ఇంటి ' ఆయన వంట ' ఇంటి ' కుందేలు అని అప్పటి మాటైతే, ఇప్పుడు ' ఇంటి ' కి ఇద్దరు, సమాన బాధ్యతలతో సమాన హక్కులతో, జంట గా జత గా ఉంటున్నారు.   ' కొంతమంది ' ఇంటి ' కంటే గుడి పదిలమన్నట్టుగా, శలవు రోజున 'ఇంటి' కంటే మాల్స్ లో గడిపే ప్రబుధ్ధులు ఉన్నారు.   ' ' ఇల్లు' కట్టి చూడు, పిల్ల పెళ్ళి చేసి చూడు  అని వారంటే, క్యాంపస్ ఉద్యోగం రావడమేమిటీ, లోను తీసికుని ' ఇల్లు' కట్టేస్తున్నారు  ( అదే లెండి ఫ్లాట్ ). దానికి ఎడ్వాన్సు కట్టే డబ్బు, రిటైరయిన తండ్రికొచ్చే సొమ్ము బాపతు, లోన్ తీసికున్నందుకుకాను, ఓనర్ షిప్ మాత్రం కొడుకు పేరు.   ' ' ఇల్లు' కట్టగానే సరిపోతుందా, ముందున్నది ముసళ్ళపండగ అన్నట్టు, వాయిదాలు ( EMI) కట్టడం. ' ఇంటి' వాడయ్యాడు కదా , స్వీట్ హోం.. 'ఇంటి ' కి ఇల్లాలు కావాలి కదా, వివాహం హ్యాపీ మ్యారేజ్. రిటైరయిన తల్లితండ్రులతో కలిసి ఉండేసరికి ' ఇల్లు ' చిన్నదవడంతో, ' ఇల్లు' ఇరకాటం ఆలి మర్కటం. పడక ' ఇంటి' ముచ్చట్ల బదులు ' ఇంటింటి' రామాయణం (  घर घर की कहानी..)    ' తిన్న ' ఇంటి' కే వాసాలు లెక్క పెట్టేవారనేవారు. ఇప్పుడు వాసాలెక్కడ, స్లాబ్ కదా. సిటీ లో అద్దెకిచ్చామా, స్లాబ్ చూస్తూ, ఖాళీ చేయకుండా  ' స్లాప్ ( slap)  ' ఇచ్చే మహానుభావులెందరో.    ' ' ఇంటి ' లో wi-fi  పెట్టి, password  జాగ్రత్తగా పెట్టుకోకపోతే, ' ఇంటి ' దొంగని ఈశ్వరుడైనా పట్టలేన్డన్నట్టుగా అయిపోతుంది. ' ఇంటి ' కి వచ్చినవారికి మంచినీళ్ళతో  wi-fi password  కూడా ఇచ్చేశామనుకోండి, అంతకు మించి అతిథి సత్కారం  మరోటి లేదు.  ( అతిథి దేవో భవ ).
   ' అమ్మాయిని పెద్ద ' ఇంటి ' లో ఇవ్వాలని, పేద ' ఇంటి ' అమ్మాయిని, తెచ్చుకోవాలని ఇదివరకు అనుకుంటే, అమ్మాయి కానీ, అబ్బాయికానీ  స్వంత ఫ్లాట్ ఉందా, ప్రేమ పేరుతో పెళ్ళిళ్ళు చేసుకునే యువతీయువకులు చాలామందే ఉన్నారు.
   ' మీ ' ఇల్లు'  చిదంబరమా, లేక మధుర ( మీనాక్షి) మేనా,  అని గడుసుగా అడుగుతారు.    ' మా ' ఇంటి ' సభ్యులు నలుగురు, నలుగురూ బ్లాగర్లే, నాలుగు  FB Account లూ,  నాలుగు  Saving Account లూ. Like లతో.,  Comments లతో   Happy  గా ఉన్నామని ఓ ఇల్లాలు చెబితే, ' అమ్మ నీ 'ఇల్లు' బంగారం గానూ ' అనుకున్నాను..
    ' మా 'ఇంటి ' లో Quiz సమాధానాలు  Messenger లో పంపుతున్నాను కనక సరిపోయింది, లేకపోతే వంట ' ఇంటి' లో పోపులపెట్టి లాగ, దేవుడి గూటిలో వత్తుల పెట్టిలా అయిపోయుండేది నా Tab.   '  Homemaker  అనండి,  Housewife  అనండి, ' ఇంటి' కి దీపం మాత్రం ఇల్లాలే. ' ఇంటి' ని స్వర్గం చేసినా, ' ఇంటి' ని నరకం చేసినా ' ఇంటి' ఇల్లాలి చేతిలో మాత్రమే ఉంది.
   ' అయినా పొరుగు ' ఇంటి ' సంగతులు నాకెందుకూ?  నా ' ఇంటి ' సంగతులు నేను చూసుకోకా... కథ కంచికీ మనం ' ఇంటి' కీ....  


జై మాతాది...






   మొత్తానికి  “ అమ్మవైష్ణోదేవి  , మా స్నేహితులు శ్రీ దాసరి అమరెంద్ర గారి ద్వారాపిలుపుఅందించగా, ఇన్నాళ్ళకు, “ అమ్మదర్శనం చేసికుని, , మా 44 పెళ్ళిరోజున,  ( ఫిబ్రవరి 28 )  ఆశీర్వచనాలు అందుకునిక్షేమంగా తిరిగి వచ్చాము.
    కిందటిసారి, శ్రీ అమరేంద్ర పూణె వచ్చినప్పుడు, వారి చెవిలో మాట వేశాము—“ “మాకు వైష్ణోదేవి దర్శనం చేయిస్తారాఅని. ఎంతైనా వారిని మా దైవదూత క్యాటిగరీలో వేసికున్నాముగా మరి ! ఆయనకున్న బిజీ బిజీ కార్యక్రమాలలో, మా  కోరిక గుర్తుపెట్టుకుని సందేశం పంపారు, మూడు వారాల క్రితంపంపడమేమిటి, వెంటనే,  https://www.maavaishnodevi.org.  లో Register  చేసికుని, హెలికాప్టర్ టిక్కెట్టు  ( Rs.  4300 ఇద్దరికి, రాను పోను ), ఒక రాత్రి ఉండడానికి NIHARIKA Guest House  లో ఒక డబుల్ రూమ్ ( Rs 1300 ),    బుక్ చేసికుని, తరువాత ఢిల్లీకి, దురొంతోలో బుకింగు చేసేశాను. వివరాలు, ఆయనకు తెలియచేయగానే, ఆయన  ఢిల్లీ నుండి  Katra   బుకింగు చేసేశారు. ఇంకేముందీ, ఎన్నాళ్ళనుండో ఎదురుచూస్తూన్న , మా కోరిక సఫలీకృతం అవడానికి , కార్యక్రమం సెటిలయిపోయింది.
    ఫిబ్రవరి, 26 బయలుదేరి, 27 కి ఢిల్లీ చేరాము. స్టేషనులో, శ్రీ అమరేంద్ర గారు, మమ్మల్ని రిసీవ్ చేసికుని, ద్వారకా లో వారింటికి తీసికెళ్ళారు. రాత్రి, 8. 50 కి  రైలెక్కి, మర్నాడు ఉదయం  8.00 కి  Katra  చేరాము. అక్కడ  గెస్టు హౌస్ లో కాలకృత్యాలు పూర్తిచేసి, రెడీ అయాము. మా దారిన మమ్మల్ని వదిలేసి, శ్రీ అమరేంద్ర నడిచి కొండ ఎక్కడానికి వెళ్ళారు. మేమిద్దరమూ, ఆటో తీసికుని  ( మనిషికి 100 చొప్పునహెలిపాడ్ చేరాము. అక్కడ మా slot  1.00. కి, కానీ, ఖాళీలుండడం మూలాన, 11.15 ట్రిప్పులో ఎక్కించేశారు. అంతాకలిపి 5 నిమిషాల్లో కొండ పైకి చేరాము. పైన హెలిపాడ్ బయటే, గుర్రాలు, డోలీలు కనిపిస్తాయి. గుర్రం  ( మనిషికి Rs 275/-).  హెలికాప్టరు దిగీ దిగగానే వాళ్ళు చెప్తారుసరీగ్గా 3 గంటల్లో తిరిగి రావాలని. అక్కడ , శీఘ్ర దర్శనానికి ఒక Yellow Parchi  ఇస్తారు, అదిమాత్రం తీసికోవడం మర్చిపోకండి. లేక పోతే, పైకి ఎక్కిన తరువాత   Room No 8 , Kaali Mandir  లో కూడా, మీ రానూపోనూ హెలికాప్టరు టిక్కెట్టు చూపించినా ఇస్తారనుకోండి. సదుపాయం Round Trip  వారికి మాత్రమేడోలీలో వెళ్ళడానికి  Rs 2500 (మనిషికి), మోయడానికి నలుగురుంటారు. రానూ పోనూ 5000 అన్నమాట , హెలిపాడ్ నుండి, దర్శనం వరకూ. అయినా గుర్రాలు దిగి, పది నిముషాలు నడవాలనుకోండి. వివరాలన్నీ, మీకు తెలియవని కాదు, ఇప్పటిదాకా వెళ్ళని వారికి ఉపయోగ పడతాయేమో అని వ్రాశాను.      https://www.youtube.com/watch?v=7Bpigcf9uA4
    మొత్తానికి చెరో గుర్రమూ ఎక్కామండి. మనమేమైనా శివాజీ, రాణా ప్రతాప్ లమా ఏమిటీ, గుర్రం మీద కూర్చున్నంతసేపూ, అంటే 45 నిమిషాలు, గుండెలు అరచేతిలో పెట్టుకునే కూర్చున్నాను, అది గట్టిగా అడుగులేసి పరిగెత్తినప్పుడల్లా, గుండె గుభేల్ మనేది, ఎక్కడ కింద పడిపోతానో అని ! మొత్తానికి ఎక్కడా పడకుండా, Yello Parchi  చూపించగానే,   GATE No  5  వరసలో నుంచో పెట్టారు. తెరిచి ఉంటే, GATE NO 2.   ( పాత గుహ లోంచి కూడా అనుమతిస్తారు. అందులో పాకి వెళ్ళాలి ). మధ్య మధ్యలో   Gate  ని మూసేస్తూంటారు. అలాటప్పుడు,  GATE NO 5   అన్నమాటఏదైనా  PRIORITY DARSHAN  లోకే వస్తుంది. సాధారణ యాత్రికులకి   GATE No 3. దానికైతే చాలా పెద్ద క్యూ ఉంటుంది.. మనం అమ్మ దర్శనం చేసికుని,  3 గంటల్లో helipad  కి తిరిగి వెళ్ళడానికి చేసే సదుపాయం ఇది.
     పది నిముషాలు నడవగానే, “ అమ్మ “  దర్బారులోకి  వెళ్ళగలిగాము.  A LONG CHERISHED WISH WAS FULFILLED….  అక్కడ మనం కోరుకున్నవన్నీ తీరుతాయంటారు. కానీ అక్కడి దృశ్యం చూస్తే, అసలు కోరికలేముంటాయంటారూమనక్కావాల్సినవన్నీ అమ్మే చూసుకుంటుందిలే, అని దండం పెట్టుకుని వచ్చేయడమేఇక్కడ విషయం చెప్పుకోవాలి దేవుళ్ళకి కోపం వచ్చినా సరేమన తిరుపతి వెంకన్న, మహ అయితే, అర క్షణం, లేదా లిప్తపాటు మాత్రమే దర్శనం ఇస్తారు. కానీ ఇక్కడ, చాలా చాలా దగ్గరనుండి, కనీసం ఒకటి రెండు నిముషాలైనా, అమ్మని దర్శించుకునే భాగ్యం కలుగుతుంది.
బయటకు వచ్చి, 45 నిముషాలు, మళ్ళీ గుర్రాలు ఎక్కి,, హెలికాప్టరులో, కిందికి క్షేమంగా తిరిగి వచ్చాము. హెలిపాడ్ నుండి, మళ్ళీ ఆటో ఎక్కి, తిరిగి గెస్టు హౌసుకి చేరాము.   ఇంకో గంటన్నరకి, శ్రీ అమరేంద్రగారు కూడా తిరిగి వచ్చారు. మర్నాడు ప్రొద్దుటే, 9.00 కి, ట్రైను ఎక్కి, జమ్మూ చేరాము. అక్కడ  శ్రీ అమరేంద్ర గారి స్నేహితుడు, శ్రీ పవన్ కుమార్, మమ్మల్ని  కలిసి, జమ్మూ లో ఉన్న కాళి మాత గుడి, రఘురాం జీ గుడికీ  తీసికెళ్ళి దర్శనం చేయించారు. రాత్రి మళ్ళీ రైలెక్కి, మార్చ్ 1 కి ఢిల్లీ చేరి, 2 బయలుదేరి, 3 తారీకు  ఉదయం 11 కి తిరిగి పూణె చేరాము.
   మా చిరకాలవాంఛ తీర్చుకోగలిగాము.

    వైష్ణోదేవి యాత్రలో  Online Registration  చేసికుంటే తప్పకుండా గుర్తుంచుకోవాల్సినవి

1.     Take a Print Out of Helicopter  Ride.

2.    Take the  Identity Proof (in Original) and also Debit/ Credit Card through which, payment was made.


3.   . Do NOT FORGET to Collect The YELLOW PRIORITY  PARCHI as soon as you land at SANJHI CHAT ( Uphills). Then only one can complete the Darshan successfully and return in time to the Helipad, for return Journey.





పతియే పరమేశ్వరుడు, ఇల్లే వైకుంఠం
 
Copyright 2009 ఇదీ సంగతి All rights reserved.
Blogger Templates created by Deluxe Templates
Wordpress Theme by EZwpthemes